Т.И. Филиппов
Краткое сказание о житии святых Кирилла и Мефодия, Просветителей Словенских

Вернуться в библиотеку

На главную


Ведети подобает, благочестивый читателю, яко исперва един бе род Словене, иже седяху по Дунаеви, отню дуже насилия ради нашедших на ня язык разидошася по странам и прозвашася имены своими, яко же: Морави и Чеси со Словаки, Сербы же и Болгары, Хорвати и Хорутане, Ляси же и Поморяне, и иныи, иже в пределах селения нашего седоша, от них же ныне сущая Русь. Тяко разидеся словенский язык. Времени же многу минувшу, неции от Словен крещением святым просвещены быша, прочим еще во тьме кумирослужения коснящим: обаче и крестившимся, своих же им письмен не имущим, нужд бе греческими и римскими письмены писати словенскую речь без устроения. Сим же тако бывшим, князие моравстии послаша к греческому царю, глаголюще: земля наша крещена, и несть у нас учителя, иже бы протолковал нам святыя книги. Сего ради послите нам сицевыя учители: от вас бо добр закон исходит во всяку землю. Бе же в Солуни град, иже есть близь святыя горы афонския, муж некий именем Лев, велика рода и царю знаем, и от сынов его два, Константин философ и Мефодий, разумива языку словенску (Солуняне бо вси чисто словенски беседоваху), от них же Константин измлада ко царю Михаилу в полату ят бысть, да купно с ним царь, еще отрок сый, научению книжному до конца навыкнет. Умолена от царя, идоста Константин и Мефодий в Мораву, и нача святый Константин составляти письмена азбуковная словенски. По сих преложиста с греческаго языка в словенский Евангелие и Апостол. Ради же беша Словене, слышаще величия Божия своим им языком. Инии же глаголют, яко прежде даже не приити послом моравским, уже бяху составлена святым Константином письмена словенская, потребы ради ближайших ко граду Солуню Словен, в Македонии живших. Сие же Бог свесть: едино точию вемы, яко вся племена словенская, начен от восточных стран македонских и болгарских даже до пределов селения их к западу, добраго подвига сея блаженныя двоицы причастишася и даже до днесь, аще и разлучена телесы, обаче духом совокуплена и союзом любве связуема, память о них добре творят по реченному: "Поминайте наставники ваша, иже глаголаша вам слово Божие", и к сим умными очесы выну зрят, обновления жизни своея чающе. Видевше же епископи моравстии, иже от Немец бывшии, яко преложены быша Моравляном святыя книги, позавидеша сему и клевету злу в слух папы римскаго на святыя изнесоша: темже повеле има приити в Рим, да воздадят пред ним слово о них же научиста и сотвориста в земли моравстей. Она же абие идоста (не оу бо бе папа отлучен от единости веры) и удобь изъявиста ему злохитрых Немец лесть и безумное тех мудрование: глаголаху бо окаяннии, яко не подобает хвалити Бога имеми языки, но точию еврейски, гречески и римски, по писанию Пилатову на кресте Господни. Папа же, еще правоверен сый, запрети Немцем, Пилату соревнующим, братиям же честь велику возда, к совершению благаго начала их призывая. Разболевся же святый Константин к смерти, схиму святую восприя и Кирилл наречеся, и тако душу свою честную и трудолюбную Господеви предаде во граде Риме в лето Господне 869, месяца Февруариа в 14 день. Мефодий же возвратися в Мораву, архиепископство области сея прием, и преложи тамо вся книги исполнь. Обаче Немцы онии зломудреннии от первыя злобы своея не престаша, и князя моравска Святополка прехитривше, святаго Мефодия в Швабы заточиша, идеже пребысть святый в тесноте велицей два лета и пол. Последи же паки архиепископство свое восприят и по всей земли моравстей веру истинную утверди и многи во тьме идольстей сидящия к Христу приведе. Еще же и в Чехи достиг, князя чешского Боривоя и супругу его святую Людмилу крещением просвети, якоже и прежде, до пришествия в Мораву, князя болгарскаго Бориса крести. Таже в старости добрей, исполнь дней многих и дел благих, почи о Господе в лето Господне 885, Априлиа в 6 день, и в Велеграде моравстем погребен бысть. Тем же зовем: радуйтася, вертограда словенскаго делателя непостыдная, и Господа, Ему же со дерзновением предстоита, молита непрестанно: да вси паки едино будем о Христе Иисусе, Ему же слава во веки. Аминь.


Впервые опубликовано в книге: "Первые 15 лет существования С - Петербургского Славянского Благотворительного Общества". СПб., 1883. С. 47 - 49 .

Тертий Иванович Филиппов (1825 - 1899) - российский государственный деятель, сенатор (с 1 января 1883 года), действительный тайный советник (с 9 апреля 1889 года), Государственный контролёр России (с 26 июля 1889 до 30 ноября 1899 года). Кроме того - публицист, православный богослов и собиратель русского песенного фольклора.


Вернуться в библиотеку

На главную